9 April 2024
Die Suid-Afrikaanse Polisiediens het ‘n waarskuwing uitgereik oor verdagtes wat Facebook se koop-en-verkoop-platform, Market Place gebruik om mense te beroof, of leed aan te doen.
Dit kom nadat twee broers die afgelope naweek vermoor is toe hulle glo na iemand uitgereik het wat ‘n advertensie op Market Place geplaas het.
Volgens die polisiewoordvoerder, kolonel Priscilla Naidu is die twee mans na ‘n adres wat op die advertensie aangedui is, maar het gou besef dat die inwoners by dié adres nie kennis dra van ‘n advertensie nie. Die broers is egter buite die huis deur twee gewapende verdagtes oorrompel en van ondermeer hulle voertuig, en selfone beroof.
Naidu het ‘n beroep op mense gedoen om ekstra waaksaam te wees indien hulle gebruik maak van sosiale media om aankope te doen. Sy sê mense moet seker maak van die verkopers se identiteit en enige transaksies moet in die openbaar geskied.
Facebook het ook vroeër ‘n waarskuwing uitgereik dat slenters deur middel van Facebook Marketplace in Suid-Afrika aan die toeneem is. Volgens Business Tech is daar sedert verlede jaar talle sake aangemeld waarby mense kla dat hulle met dié platform gelok is, en dan beroof is.
Dit is volgens die berig veral produkte soos voertuie, TV’s, sonpanele en selfs klaviere wat mense lok. Volgens die berig word voertuie teen “aantreklike pryse” aangebied en is baie dikwels te goed om waar te wees.
