14 Februarie 2023
Die polisie het die afgelope twaalf maande meer as 65000 vuurwapens uit sirkulasie verwyder.
19000 van dié vuurwapens is verlede week vernietig. Dit sluit handwapens, gewere, haelgewere asook dele van vuurwapens en kombinasie-vuurwapens in.
Die polisiewoordvoerder, brigadier Athlenda Mathe sê die vuurwapens is òf tydens voorkomingsoperasies afgeneem òf vrywillig afgestaan òf aan die Staat tydens die amnestieperiode tussen 2019 en 2021 verbeurd verklaar.
Mathe sê die wapens is aan ballistiese toetse onderwerp om vas te stel of hulle tydens die uitvoering van misdade gebruik is.
Voor verlede week se vernietiging van vuurwapens is nog meer as 20 000 in Julie vernietig en meer as 26000 in Maart verlede jaar.
Mathe sê onwettige vuurwapens is ‘n bedreiging vir die veiligheid van die gemeenskap.
