13 Januarie 2023
Elf nuwe hoogs gespesialiseerde beamptes is toegelaat in die polisie se Spesiale Taakmag.
Dié beamptes se vlerke is deur die polisiekommissaris, generaal Fannie Masemola, toegeken nadat hulle opleiding van twee jaar voltooi het.
Volgens die nasionale polisiewoordvoerder, brigadier Athlenda Mathe, het hulle 906 aansoeke ontvang om by dié Spesiale Taakmag aan te sluit.
Slegs 589 aansoekers het vir voorlopige keuring gekwalifiseer en dié getal is later verminder tot 93 aansoekers. Slegs 11 uit dié 93 aansoekers het die Spesiale Taakmag se basiese opleidingsprogram suksesvol voltooi.
Een van die elf beamptes is ‘n 31-jarige vrou. Die Spesiale Taakmag is ‘n spesiale eenheid wie se beamptes verantwoordelik is vir hoë risiko voorvalle, soos gyselaarsgevalle.
Om te kwalifiseer moes beamptes ses maande voltooi in die polisiekollege en moet hul ten minste twee jaar se werkservaring hê. Die kandidate kan ook nie ouer wees as 32 nie. As deel van fiksheidstoetse moet hulle 3,2 kilometer kan hardloop in stewels, langbroeke en met ‘n geweer binne 18 minute.
Hulle moet ook sestig opsitte in twee minute kan doen en 10 keer 25 meter naellope in 65 sekondes voltooi.
