7 Julie 2021
Alle oë is steeds op Nkandla om te sien of oud-president Jacob Zuma voor die spertyd van die Grondwethof se bevel in hegtenis geneem sal word.
Die minister van polisie, Bheki Cele en die nasionale polisiekommissaris, Khehla Sitole het vroeër vandag gesê dat hulle vir direktiewe van die Grondwethof wag voordat hulle optree. Cele is luidens berigte tans by Nkandla.
Intussen sê bronne binne die polisie met kennis van die saak, dat die polisie se lugvleuel in KwaZulu-Natal op ‘n hoë gereedheidsgrondslag geplaas is om bystand op Nkandla te verleen – indien dit sou nodig wees.
Minstens een helikoper staan gereed op die sportveld van die Hoërskool Empangeni – sowat 130 kilometer van Zuma se woning af.
Die helikopter – tesame met ‘n aantal ondersteuningsvoertuie – is reeds van Maandag af daarheen verplaas nadat skares van Zuma se ondersteuners oor die naweek hulle steun aan die voormalige president getoon het.
Verskeie polisie-eenhede, onder andere openbare-orde-eenhede van Empangeni en Durban is ook in die omgewing van KwaNxamalala opgemerk.
‘n Kort ruk gelede het lede van die Umkhonto we Sizwe- militêreveteranevereniging (MKMVA) ook ‘n polisievoertuig verhoed om Nkandla binne te gaan.
