7 Desember 2023
Die departement van polisie het bykans R500 000 opgedok sodat die minister van polisie, Bheki Cele se uitvoerende assistent saam met hom die Rugby Wêreldbekereindstryd in Frankryk kon bywoon.
Cele het die inligting in ‘n parlementêre antwoord op ‘n vraag van die DA onthul.
Hy sê sy reisuitgawes is egter deur ‘n private maatskappy betaal, en slegs R33 000 is deur die departement betaal vir reisversekering en verblyftoelae.
Die DA se partywoordvoerder oor polisie, Okkie Terblanche sê dit is “onbegryplik” dat Cele toelaat dat byna ’n halfmiljoen rand bestee word aan ’n assistent, terwyl die polisie reeds begrotingsbeperkings, ’n tekort aan speurders en vervalle polisiekantore het.
Volgens Terblache het Cele ook nie bekend gemaak watter private maatskappy vir die reis betaal het nie, en daarom het hulle ‘n aansoek ingevolge die Wet op die Bevordering van Toegang tot Inligting (Paia) ingedien om meer inligting te bekom.
Die DA sal in die nuwe jaar ‘n klag van die oortreding van die etiekwet vir lede teen Cele indien.
Foto: Action Society
