30 April 2021
Die vyf mans, wat betrek word by die skietdood van twee broers op die Pampoenkraalplaas op 9 April in die Dirkiesdorp-omgewing se borgtogaansoek het geslaag.
Al vyf is op borgtog van R 10 000 elk vrygelaat.
LEES OOK: PIET RETIEF: MANS HOOR WAARSKYNLIK VANDAG OF BORGTOGAANSOEK SLAAG
Landdros Sam Fankomo het bevind die staat het nie bo redelike twyfel bewys die beskuldigdes se oortredings moet geklassifiseer word as skedule 6-oortredings nie. Die aanklagte teen hulle word dus nou geag as skedule 5-oortredings.
Die staat het aangevoer dat die boere ‘n komplot gedryf het en dat dit hulle gemeenskaplike doel was om moord te pleeg.
Die verdediging het egter beeldmateriaal verskaf, wat deur statiese kameras vasgevang is waarin daar glo bewys word dat die boere kalm en nie geweldadig was nie.
LEES OOK: PIET RETIEF: BORTOGAANSOEK WEER UITGESTEL
Fankomo het in sy uitspraak gesê dat sekere dele van die ondersoekbeampte, adjudant-offisier Vukile Nhlapho se getuienis as onwaar bewys is, maar meen dit beteken nié dat die staat nie ‘n sterk saak het nie.
Hy meen daar moet nog baie ondersoekwerk gedoen word.
Die saak is tot 30 Junie uitgestel.
Intussen blyk dit asof die skare buite die landdroshof ontevrede met die uitspraak is omdat honderde betogers sedert die eerste verskyning eis dat borgtog nié toegestaan moet word nie.
