10 September 2024
Die Phokwane-plaaslike munisipaliteit, wat Hartswater, en omliggende gebiede in die Noord-Kaap dien, het onlangs sy Spring Bonanza-veldtog geloods in ʼn poging om ʼn deel van die sowat R1-miljard wat inwoners die munisipaliteit skuld, in te vorder.
Die veldtog geld slegs vir agterstallige diensterekeninge en nie vir eiendomsbelasting nie. Die VF Plus-raadslid in die munisipaliteit, Rickus Te Baerts sê hiervolgens sal agterstallige rekeninge teen ʼn rand vir ʼn rand afgeskryf word.
Hy meen daar blyk egter ʼn belangebotsing te wees aangesien daar raadslede is wat gesamentlik byna R1,14-miljoen skuld wat langer as 90 dae agterstallig is. Hy sê dit is volgens die mees onlangse syfers wat aan die raad voorgelê is.
Te Baerts sê omstrede deel van die raad se besluit is dat dit nie net op rekeninge van toepassing is wat langer as 90 dae agterstallig is nie, maar ook op rekeninge wat op datum is.
“Die debat oor die veldtog het daarna herhaaldelik ʼn rassistiese koers ingeslaan. Sommige raadslede sê wit mense is voorheen bevoorreg en moet betaal terwyl daar teen swart inwoners gediskrimineer is,” sê Te Baerts.
Hy sê dit is nog altyd die VF Plus se standpunt dat dienstegelde nie afgeskryf moet word nie en dat dit net die kultuur van nie-betaling sal bevorder, ook onder getroue belastingbetalers.
