18 November 2022
Die outeur en ondersoekende joernalis, Jacques Pauw, sê hy het nog geen aanduiding gekry dat die EFF voortgaan met regsoptrede oor sy boek: Our Poisoned Land nie.
Pauw het voortgegaan om sy boek bekend te stel ten spyte van ‘n prokureursbrief waarin hy gevra word om die boek terug te trek en om senior lede in die EFF om verskoning te vra vir uitlatings wat hy in dié boek gemaak het.
Die boek is steeds op die winkelrakke beskikbaar.
LEES OOK: EFF EIS DAT BOEK VAN WINKELRAKKE VERWYDER WORD
In die boek beweer Pauw dat die omstrede tabakhandelaar, Adriano Mazzotti, die partyleier Julius Malema met alkohol en kontant ingestop het.
Die EFF het die bewerings ontken en sê dit is op skinderpraatjies gegrond.
Volgens Pauw sal hy die geleentheid verwelkom indien die boek in die hof gaan draai aangesien dit Malema dan in die kollig sal plaas en hom die geleentheid gee om Malema te kruisondervra.
