11 Februarie 2022
Die VF Plus sê dit is onaanvaarbaar dat passasiers en vlieëniers met die reuk van riool begroet word wanneer hulle land by die Vereeniging-lughawe.
Rioolvloei by die lughawe is reeds ʼn geruime tyd ʼn probleem, veral op die aanloopbaan en die gebied rondom die brandstofpompe. Die VF Plus-raadslid in die Sedibeng-distriksmunisipaliteit, Rian Lubbe sê buiten die vryelike vloei van riool, is al die mangatdeksels vermoedelik gesteel en is die reuk onuithoubaar.
Hy meen riool vloei ook vrylik deur die vliegskoolgebou waar 40 studente opgelei word.
Die lughawe is onder die jurisdiksie van die Sedibeng-distriksmunisipaliteit, maar alle instandhoudingswerk word deur die Emfuleni-plaaslike munisipaliteit hanteer.
“Die ANC het egter Emfuleni so finansieel wanbestuur dat dit basies bankrot is en nie die basiese dienste kan lewer of infrastuktuurinstandhouding kan doen nie,” sê Lubbe.
Met 45 rioolpompe wat buite werking is, is rioolstortings ʼn algemene gesig in dié munisipaliteit. “Dit is onaanvaarbaar dat ʼn bate wat ʼn groot bydrae kan lewer tot die ekonomiese vooruitgang van die gebied tot in die afgrond verwaarloos word.”
