26 Oktober 2023
Die hooggeregshof in Johannesburg het dele van die Wet op Basiese Diensvoorwaardes – wat ouerskapverlof reguleer – ongrondwetlik verklaar.
In sy uitspraak sê regter Roland Sutherland dat dit strydig is met die belange van die kind en die waardigheid van ouers en hul kinders aantas.
Volgens die uitspraak word daar tans onbillik tussen ouers gediskrimineer – na gelang van of hul kind uit die moeder gebore is; verwek is deur surrogaatskap of aangeneem is.
Die regsfirma, Norton Rose Fulbright SA Ingelyf se Impact Litigation-span – wat namens die Kommissie vir Geslagsgelykheid in die aansoek opgetree het – het verduidelik dat dit sou beteken dat ouers in ‘n natuurlike geboortereëling kan kies watter ouer die hele vier maande ouerskapsverlof sal neem – of hulle kan daardie tydperk tussen hulle verdeel.
Ouers wat ‘n kind jonger as twee jaar aanneem – en ouers in ‘n opdraggewende ouerreëling – sal geregtig wees op dieselfde verlof as wat van toepassing is op ouers met ‘n natuurlike geboorte.
