ActionSA sê dit is onaanvaarbaar dat daar sommige ministers in die kabinet is wat parlementêre vrae herhaaldelik ignoreer.
ActionSA se parlementêre leier, Athol Trollip sê al het parlementslede weer hulle vrae, formeel ingedien word dit steeds nie beantwoord nie. Hy meen dit weerspieël ‘n kommerwekkende minagting vir parlementêre toesig en aanspreeklikheid.
Volgens Trollip het die party die afgelope jaar 121 vrae in die parlement ingedien, waarvan 86 nog nie beantwoord is nie. Hy sê dit beteken dus dat 70% van hulle pogings om die regering verantwoordbaar te hou, op dooie ore val.
Trollip sê ActionSA het reeds in November verlede jaar dié kwessie onder die speaker se aandag gebring, en dit direk met ministers bespreek.
Hy meen dit is nie net blote verwaarlosing nie, maar is ‘n ernstige skending van parlementslede se grondwetlike mandaat.
“ActionSA oorweeg regstappe indien die kultuur van onbeantwoorde vrae voortduur.”
