13 Junie 2023
Die Kaapse Forum en Solidariteit vra dat die nuwe indiensnemingsregulasies ingevolge die Wysigingswet op Gelyke Indiensneming onderwerp word aan ‘n spesiale parlementêre debat én stopgesit word.
Die burgerregteorganisasie en vakbond het saam met gemeenskapsleiers vanoggend die parlement in Kaapstad gepetisioneer. Volgens die petisie is die nuwe wet en regulasies ongrondwetlik en irrasioneel.
LEES OOK: SOLIDARITEIT DAGVAAR PRESIDENT RAMAPHOSA OOR “RASWET”
Die uitvoerende voorsitter van die Kaapse Forum, Heindrich Wyngaard, meen die impak van die nuwe raswet en -regulasies sal groot ontwrigting in Suid-Afrika tot gevolg hê. “Dit is suiwer ʼn raswet wat die samelewing op grond van ras klassifiseer en manipuleer.”
Die bestuurshoof van Solidariteit, dr Dirk Hermann, het op sy beurt gesê dat ‘n parlementêre debat oor die wet noodsaaklik is omdat dit as sosiale manipulasie beskou kan word.
“Die gevolge van die wet wat deur die parlement aanvaar is, is duidelik. Dit regverdig nie net ʼn parlementêre debat nie, maar maak dit noodsaaklik. Suid-Afrika sal wil hoor hoe die parlement hierdie soort sosiale manipulering kan regverdig,” sê Hermann.
LEES OOK: SOLIDARITEIT VRA MAATSKAPPYE OM SAAM TE STAAN TÉÉN REGERING SE RASWETTE
Die regulasies vereis dat poste vir bruin werknemers met 25% en dié vir wit en Indiërwerknemers met 66% verminder moet word.
