2 Julie 2021
Dele van die plaas Pampoenkraal naby Piet Retief is glo aan die brand gesteek nadat agt mans – wat daarvan aangekla word dat hulle in Augustus verlede jaar twee mans daar doodgemaak en ‘n derde ernstig beseer het – deur die hooggeregshof op Middelburg op borgtog vrygelaat is.
‘n Inwoner van die plaas, Ursula Greyling-Potgieter het aan Netwerk24 gesê die skaapwagters op die plaas het hulle omstreeks 20:00 gisteraand laat weet dat iemand begin het om dele van die plaas aan die brand te steek.
LEES OOK: PIET RETIEF: AGT MANS BORGTOG GEWEIER
Minstens vyf verskillende brande is op die plaas opgemerk en boere in die omgewing het die inwoners te hulp gesnel om die brande te probeer blus.
Greyling-Potgieter sê hulle het nie self aan die brandbestrydings-poging deelgeneem nie omdat hulle versigtig was dat die brandstigting dalk ‘n poging was om hulle uit die huis uit te lok.
Dit is nie bekend of die brande al onder beheer gebring is nie.
Intussen is die saak tot 23 Julie uitgestel.
