5 September 2023
Terwyl Suid-Afrikaners om middernag meer vir brandstof sal moet opdok, het mense in Pakistan die strate ingevaar om oor stygende krag- en brandstofpryse dáár te betoog.
Die ekonomie het die afgelope naweek erg gesteier nadat verskeie winkels en markte besluit het om hulle deure uit ontevredenheid oor dié stygende kostes te sluit.
Dit het die land glo sowat 10-miljard roepee, of nagenoeg R2,3-miljard gekos.
Kragpryse het binne drie maande verdubbel, terwyl die krag glo slegs vir nege uur ‘n dag aan is en betogers sukkel om in hulle basiese behoeftes te voorsien.
Die minister van energie, Muhammad Ali blameer die vorige regering vir die stygings in pryse en skryf dit toe aan voorwaardes van ‘n lening wat vroeër as reddingsboei met die Internasionale Monetêre Fonds aangegaan is.
