21 Junie 2023
Die Outomobiel Assosiasie (AA) sê 2022 se padsterftestatistieke skets ‘n donker prentjie oor padveiligheid in Suid-Afrika en beskou dit as ‘n nasionale krisis.
Volgens ‘n verslag State of Road Safety in South Africa deur die Padverkeersbestuurskorporasie (RTMC) is 12 436 mense tussen Januarie 2022 en Desember 2022 op die land se paaie dood. 5 347 van dié sterftes was voetgangers. Dit kom neer op 43%.
Die AA sê 2022 se padsterftes is net effens laer as die 12 541 padsterftes in 2021.
Sedert 2013 is 126 546 mense op die land se paaie dood. Volgens die AA is dié syfers onaanvaarbaar hoog. Volgens die RTMC is daar sekere veranderinge gemaak om padveiligheid te verseker, maar volgens die AA word daar steeds nie genoeg gedoen nie.
Verdere data deur RTMC toon dat 276 000 spoedoortredings verlede jaar uitgereik is – 58% hiervan was in Gauteng. Meer as 11 000 motoriste is in hegtenis geneem omdat hulle onder die invloed van drank bestuur het.
