1 November 2022
Die VF Plus sê die ongeluk die afgelope naweek tussen Jan Kempdorp en Hartswater waartydens ses mense dood is, onderstreep die gebrekkige toestand van die N18.
Die pad is deel van die N18, wat Warrenton (aan die N12 tussen Johannesburg en Kaapstad oor Kimberley) met die Ramatlabana-grenspos en Botswana verbind.
Die twee tienersussies, Janke (19), en Lize Coetzer (16) van Jan Kempdorp is saam met ‘n vriendin, Odine Swanepoel (19) oorlede. Die vriendinne was Saterdagaand saam met twee ander vriende in ‘n Volkswagen Polo op pad na Hartswater om te gaan uiteet toe hulle in ‘n kop-aan-kop-botsing met ‘n Hyundai Tuscon reg van voor betrokke was.
Die drie insittendes van die Hyundai is ook in die ongeluk dood.
Die VF Plus-raadslid in die Frances Baard-distriksmunisipaliteit, Theo Joubert sê buiten langafstandverkeer, is hierdie roete die hoofslagaar van die Vaalharts-besproeiingskema, een van die grootste en mees gekonsentreerde skemas in Suid-Afrika.
LEES OOK: DRIE TIENERMEISIES, ONDER WIE TWEE SUSSIES IN GRU-BOTSING DOOD
“Op enkele aansluitings na, bestaan die pad uit een baan in elke rigting, sonder ’n noodbaan links van die geel streep. Die afwesigheid van sigbare wetstoepassing deur die Phokwane-verkeersafdeling vererger die probleem,” sê Joubert.
Hy meen dit is duidelik dat beplanners besef het dat verkeersdrukte ’n vergrote pad sou noodsaak.
Volgens die Vaalharts-distrikslandbou-unie, (VDLU) is hierdie al die soveelste ongeluk op hierdie betrokke pad. Die unie se bestuurder, Christelle Stoman sê daar is alreeds verskeie vergaderings met die betrokke rolspelers geopper oor die toestand van die betrokke pad.
Ook die DA meen dat dit een van die paaie is wat weens ‘n gebrek aan sigbare verkeerspolisiëring en padblokkades die sogenaamde “pad van die dood geword het.”
