6 April 2021
Bykans 100 mense het oor die afgelope Paasnaweek op die land se paaie gesterf.
Volgens verkeersowerhede was bestuur onder die invloed van drank, spoed en roekelose bestuur die grootste oorsake van ongelukke gewees.
Die LUR vir vervoer in Gauteng, Jacob Mamabolo sê die getal motoriste op die provinsie se paaie was beduidend laer as ander jare. Volgens hom is ongeveer 20 mense in Gauteng in ongelukke dood.
Hy het egter sy kommer uitgespreek oor die getal voetgangers wat op die paaie raakgery is. Volgens hom het ongeveer 80% van die ongelukke gebeur weens mense wat nié by die spoedgrense gehou het nie.
Verlede jaar is 28 mense tydens Paasnaweek in ongelukke dood. Weens grendelregulasies is mense egter nie toegelaat om te reis nie. In 2019 is nagenoeg 160 mense gedurende Paasnaweek in padongelukke dood.
Meer syfers sal later bekend gemaak word.
