20 Desember 2022
Die Onafhanklike Verkiesingskommissie (OVK) sê hy het met skok kennis geneem van ‘n plasing op sosiale media waarin hy verkeerdelik betrek word by die ANC se leierskapskonferensie.
Volgens die OVK het die inhoud van die plasing dit ten doel om die reputasie en integriteit van die verkiesingskommissie en sy amptenare te skaad.
Die plasing is in die vorm van skermgrepe uit ‘n WhatsApp-gesprek tussen ‘n onbekende persoon en iemand wat hom as die hoofverkiesingsbeampte, Sy Mamabolo voordoen.
Daarin kry Mamabolo glo opdrag om ‘n sekere uitkoms van die verkiesing te bewerkstellig in ruil vir ‘n bedrag aan kontant.
Volgens die OVK is dit duidelik dat die inhoud gefabriseer is en dat dié tipe fopnuus sal toeneem nader aan die 2024-nasionale verkiesing.
