1 November 2021
Amnestie Internasionaal in Suid-Afrika het ‘n beroep op die Onafhanklike Verkiesingskommissie gedoen om ‘n voorval in Orlando-Oos – in Soweto – te ondersoek waartydens ‘n joernalis by ‘n stempunt in hegtenis geneem is.
Newzroom Afrika berig dat sy verslaggewer, Ziniko Mhlaba deur die polisie weggeneem is terwyl hy verslag gedoen het vanaf dié stempunt. Volgens Amnestie Internasionaal se uitvoerende direkteur in Suid-Afrika, Shenilla Mohamed is hulle bekommerd daaroor dat ‘n joernalis in hegtenis geneem is tydens die uitvoering van sy pligte.
LEES OOK: MEER AS 3,5-MILJOEN STEM TEEN 12:00
Sy meen verslaggewers moet toegelaat word verslag te doen oor die verkiesing en die stemmery sonder dat hulle verhoed of mishandel word – mits hulle binne die raamwerk van die wet optree.
Intussen het polisie in reaksie op die voorval gesê dat die joernalis en kameraman “met die kiesbeampte se werksaamhede ingemeng het.” Die polisie se woordvoerder, brigadier Vish Naidoo sê dit is jammer dat die voorval op ‘n konfrontasie uitgeloop het.
Naidoo sê die Gautengse provinsiale kommissaris is by die saak betrek en het hy die verslaggewer se vrylating bewerkstellig en ‘n ondersoek na die voorval gelas.
LEES OOK: SPESIALE STEMME: 83% VAN GEREGISTREERDE KIESERS DAAG OP
Newzroom Afrika het die voorval ook ten sterkste veroordeel en meen hulle personeel se veiligheid is uiters belangrik.
Stem vir die Aitsa’s
