26 Februarie 2024
Die Onafhanklike Verkiesingskommissie, die OVK sê beamptes sal vanaf 12 April die 23 292 stemlokale landswyd besoek om seker te maak dat alles in orde is.
Die OVK het vanoggend ‘n mediakonferensie gehou oor sy gereedheid nadat die verkiesingsdatum van 29 Mei in die Staatskoerant gepubliseer is.
Die OVK se hoofverkiesingsbeampte, Sy Mamabolo sê ‘n voorlopige rooster is die naweek gepubliseer.
Hierdie rooster bevat datums en vereistes waaraan kiesers en politieke partye moet voldoen voordat hulle aan die verkiesing mag deelneem.
Omdat die datum geproklameer is, mag daar geen meer registrasies van kiesers plaasvind nie. Volgens Mamabolo is die voorlopige kiesersrol vandag gepubliseer. Teen 12 Maart sal hierdie kiesersol aan politieke partye oorhandig word.
