7 September 2021
Die Organisasie teen Belastingmisbruik (OUTA) sê hulle sal die regering se planne – om fooie vir plekbesprekings te hef – teenstaan.
Dit kom nadat die departement van vervoer verlede week ‘n voorstel in die Staatskoerant gepubliseer het, waarin hy voorstel dat motoriste ‘n R250 fooi moet betaal om ‘n aanlyn plek te kan bespreek vir die hernuwing van rybewyse. Dié fooi is bykomend tot die gemiddelde R72 administrasiefooi, wat reeds betaal moet word.
LEES OOK: MEER AS 400 000 RYBEWYSE IN GAUTENG NOG NIÉ HERNU NIE
Die uitvoerende hoof van OUTA, Wayne Duvenhage sê die organisasie glo dat dit die regering se plig is om dienste aan die publiek te lewer, om te verseker dat die samelewing aan verskeie wette en regulasies voldoen, en dat géén diensfooie gehef moet word, as dieselfde fooi nié by instapdienste geld nie.
Talle Gautengse motoriste kla reeds ‘n geruime tyd dat hulle geen beskikbare plekke op die Padverkeersbestuurskorporasie (RTMC) se aanlyn-stelsel kry om hulle rybewyse te hernu nie. Die grasietydperk vir die hernuwing van rybewyse, wat tussen Maart 2020 en Desember 2020 verval het, is tot Maart 2022 verleng.
Duvenhage meen dit is onaanvaarbaar om van mense te verwag om ‘n R250 fooi te moet betaal, slegs om te kan begin met die proses om ‘n rybewys te hernu of om ‘n nuwe rybewys uit te neem.
LEES OOK: GRASIETYDPERK VIR HERNUWING VAN RYBEWYSE VERLENG
Die publiek het tot 3 Oktober kans om op dié voorstel te reageer.
Stem vir die Aitsa’s
