21 Junie 2024
Die Organisasie teen Belastingmisbruik (OUTA) meen ministers wat nie die mas kon opkom in hulle vorige portefeuljes nie, moenie deel wees van die nuwe kabinet van die Regering van Nasionale Eenheid (RNE) nie.
Die ANC se alliansievennoot, die vakbondfederasie, Cosatu, het op sy beurt ‘n beroep op president Cyril Ramaphosa gedoen om ministers aan te stel wat werkers se bekommernisse verstaan.
OUTA se uitvoerende hoof, Wayne Duvenage, sê die organisasie stel meer belang in wie nié by die nuwe kabinet ingesluit moet word nie.
Hy sê veral die minister van minerale bronne en energie, Gwede Mantashe, die minister van hoër onderwys, dr Blade Nzimande en die minister van vervoer, Sindisiwe Chikunga moet uit die nuwe kabinet gelaat word.
Duvenage sê OUTA doen baie werk aan projekte wat met dié departemente verband hou en het gevind dat die betrokke ministers gebrekkig is ten opsigte van doeltreffendheid en hoe hulle aanspreeklikheid vir wanadministrasie en korrupsie hanteer het.
Intussen wag ander organisasies en landsburgers ook in spanning oor wanneer president Cyril Ramaphosa sy kabinet gaan aankondig. Die woordvoerder in die presidensie, Vincent Magwenya sê by navraag hulle sal ’n mediaverklaring uitreik wanneer die president gereed is om ’n aankondiging te doen.
