26 Junie 2023
Die organisasie teen belastingmisbruik, OUTA, het strafregtelike klagte teen die uitvoerende hoof van die Nasionale Studente Finansiële Hulpskema (NSFAS), Andile Nongogo, en drie ander mense aanhangig gemaak.
OUTA meen Nongogo en sy medebeskuldigdes moet vir bedrog en korrupsie ondersoek word oor besluite wat hy gemaak het in sy tyd as die besturende direkteur van die onderwys- en opleidingsgesag vir die dienstesektor, SSETA.
Volgens OUTA het SSETA in 2016 byna R300 000 meer betaal as die normale prys om handelsmerke op ‘n tenderkabinet aan te bring. Hierdie betaling aan Five Star is deur Nongogo goedgekeur. Dit is ‘n oorbetaling van byna 8 000%.
Dié betrokke kabinet is volgens SSETA se bateregister R9 690 werd.
OUTA se portefeuljebestuurder, Rudie Heyneke sê die betaling aan Five Star was vir die ontwerp, ontwikkeling en verskaffing van bemarkingsmateriaal.
Die betrokke tenderkabinet is ‘n houtboks van 180 cm by 150 cm met ‘n SSETA logo daarop, en het R302 010 gekos. “OUTA het ‘n kwotasie gekry vir ‘n soortgelyke kabinet as die een by die SSETA, en by hierdie betrokke maatskappy sou dit R3 731,75 kos,” sê Heyneke.
