27 Oktober 2024
‘n Ouerpaar, en drie van hulle vier dogters is Donderdagaand (24 Oktober) op die N4-tolpad tussen Machadodorp en Nelspruit in Mpumalanga dood, toe hulle bakkie en ‘n vragmotor mekaar reg van voor getref het.
Pieter Herbst, sy vrou Chantelle en hulle dogters, die 4-jarige Anzelle, Kara (graad 3) en Mienke (graad 7) is in die ongeluk dood. Die 11-jarige Amoné (graad 6), is in ‘n kritieke toestand in die hospitaal.
Die gesin was met hulle dubbelkajuit bakkie op pad van Pretoria na Nelspruit, om vir Pieter se ouers te gaan kuier, toe die ongeluk gebeur. Amoné het agter in die kappie van die bakkie gesit, en die ongeluk oorleef.
Die provinsiale woordvoerder van die departement van gemeenskapsveiligheid, Moeti Mmusi sê die omstandighede van die ongeluk word ondersoek.
Volgens die plaaslike koerant, Die Laevelder, het die vragmotorbestuurder probeer om te vlug na die ongeluk, maar hy is opgespoor en glo nie beseer nie.
