7 Julie 2022
Ouers van twee Amerikaanse meisies wat dood is toe hulle glo aan ‘n sosiale media-uitdaging deelgeneem het, dagvaar nou TikTok vir die voorval.
Die ouers voer aan dat TikTok se sogenaamde gevaarlike algoritmes hulle kinders blootgestel het aan die Blackout-uitdaging, wat glo tot die 8-jarige Lalani Erica Walton en die 9-jarige Arriani Arroyo se dood gelei het.
Hulle is onderskeidelik in Februarie en Julie 2021 oorlede.
Die uitdaging vereis van deelnemers om hulle asems vir ‘n ruk op te hou en dan hulself te verwurg sodat hulle tydelik hulle bewussyn kan verloor.
Die ouers het Dinsdag die dagvaardiging by ‘n Los Angeles streekshof ingedien. TikTok het nog nie op die nuus gereageer nie, maar was reeds verskeie kere van te vore in die spervuur weens gevaarlike uitdagings wat op die platform opduik.
