3 Mei 2022
Ouers en versorgers word aangeraai om te verseker dat hul kinders se inentings teen masels op datum is, nadat die departement van gesondheid gewaarsku het teen ‘n vlaag uitbrekings van dié siekte.
Volgens die Wêreldgesondheidsorganisasie (WGO) is daar ‘n toename van 400% in gevalle tussen Januarie en Maart vanjaar aangemeld.
Die WGO rapporteer dat Afrika die afgelope jaar ‘n oplewing in uitbrekings van siektes – wat deur entstof voorkombaar is – ervaar.
Dr Lesley Bamford, die hoofdirekteur vir die kindergesondheidsprogram by die departement van gesondheid van die WGO, sê daar is nog geen uitbreking nie, maar ouers en versorgers moet die waarskuwing ernstig opneem.
Sy het gesê ouers en versorgers moet verstaan dat masels ‘n baie aansteeklike siekte is.
