9 November 2023
Die geskorste student aan die Universiteit Stellenbosch, Theuns du Toit is gedagvaar om op 5 Desember op twee aanklagte in die hof te verskyn nadat die Nasionale Vervolgingsgesag besluit het om hom strafregtelik aan te kla.
Dit kom nadat ‘n video in Mei verlede jaar aan die lig gekom het waarin Du Toit gesien kan word hoe hy op ‘n mede-student, Babalo Ndwayana se besittings urineer.
LEES OOK: STUDENT PERMANENT UIT US GESKORS NÁ URINE-VOORVAL
Du Toit se pa, Rudi het aan Netwerk24 gesê hulle is bly dat die NGV besluit het om sy seun te vervolg omdat hulle nou ‘n kans sal hê om Ndwayana te kruisondervra. Du Toit word van crimen injuria en kwaadwillige saakbeskadiging aangekla.
Rudi meen in ‘n strafregtlike hof sal woorde soos; “waarskynlik” nie gewig dra nie, maar dat daar tydens Theuns se dissiplinêre verhoor grootliks staat gemaak is op die woord waarskynlik. Een van die bewerings wat Ndwayana gemaak het is dat Du Toit “waarskynlik gesê het: it is a white boy thing.“
Rudi meen Ndwayana se weergawes van die gebeure het al verander.
