15 September 2023
Die minister van kommunikasie, Mondli Gungubele, het die Postbank se voormalige direkteure gewaarsku dat hulle strafregtelike aanklagte in die gesig staar.
Die minister se opmerkings kom in ‘n chaotiese maand wat die dramatiese uittog van die bank se hele direksie gesien het, nadat sagtewarefoute honderde duisende begunstigdes sonder geld gelaat het toe hul toelaes nie betaal is nie.
Gungubele het aan die nuusdiens News24 gesê hy was in stryd met die bank se voormalige direksie, en hy het hulle daarvan beskuldig dat hulle ‘n sagtewareverskaffer onwettig honderd-en-veertig-miljoen rand betaal het – sonder om wette oor openbare finansies te volg.
Volgens die minister het ‘n aanvanklike ondersoek deur die finansiëledienstefirma, KPMG, ‘n rits onreëlmatighede en misdadigheid opgespoor, met ‘n uitgebreide ondersoek wat nou aan die gang is.
