14 Februarie 2022
Die vakbond, Solidariteit het sy misnoeë uitgespreek met die onderwysdepartement se beplande wysigingswetsontwerp wat verlede week in die parlement ter tafel gelê is.
Volgens die wetsontwerp wil die departement die gesag van die provinsiale departementshoofde versterk met betrekking tot skole se taalbeleid, en oor die toelating van leerlinge by openbare skole.
Solidariteit se dr. Dirk Hermann sê dit is niks anders nie as staatskaping van skole nie.
Hermann sê hoewel hulle insette oor die wysiging gelewer het, is hy bang dat dit nie in ag geneem is nie.
Volgens Alana Bailey, AfriForum se hoof van Kultuursake, is die rede hiervoor duidelik – die departement wil steeds meer mag in eie hande sentreer, en dan spesifiek die Afrikaanse gemeenskap van hulle reg tot onderrig in Afrikaans ontneem.
“Kinders se belange en toekoms word weer eens ’n speelbal in die hande van die magsbehepte staat. AfriForum sal alle middele tot ons beskikking aanwend om te sorg dat die toekoms van Afrikaans, Afrikaanse skole en Afrikaanse kinders teen hierdie haatgedrewe aanslag beskerm word,” het sy bygevoeg.
