10 Februarie 2023
Die Organisasie teen Belastingmisbruik, Outa, sê hulle is teleurgesteld in die staatsrede wat president Cyril Ramaphosa gisteraand gelewer het.
Outa sê in ‘n verklaring dat die president baie probleme uitgewys het, maar geen oplossings daarvoor gebied het nie. Die organisasie het ook die ramptoestand wat Ramaphosa gisteraand oor die kragkrisis verklaar het, verwerp.
Outa sê hulle is van mening dat die ramptoestand nié die oplossing vir die volhoubare voorsiening van elektrisiteit in Suid-Afrika is nie.
Die uitvoerende hoof van Outa, Wayne Duvenage, sê hulle beplan om ondersoek in te stel na die besluit.
LEES OOK: RAMPTOESTAND OOR KRAGKRISIS AFGEKONDIG; SOLIDARITEIT BEGIN MET REGSTAPPE
Intussen wil dit voorkom asof die howe se drumpels deurtrap gaan word ná gister se staatsrede.
Nadat die politieke partye – die UDM en BOSA, asook die vakbonde NUMSA, SAFTU, en HAITU reeds vóór die Staatsrede bekend gemaak het dat hulle die hof sal nader indien ‘n ramptoestand oor die elektrisiteitskrisis afgekondig word, het ander instellings ook intussen aangedui dat hulle besig is om hofstukke voor te berei.
Die hoof uitvoerende beampte van Solidariteit, dr. Dirk Hermann, het reeds voor die afsluiting van die Staatsrede op die solsiale media aangedui dat dié instelling gisteraand al begin het om met hul regsverteenwoordigers te beraadslaag oor regsoptrede.
Die leier van die die DA, John Steenhuisen, het na afloop van die verrigtinge in die Kaapstadse Stadsaal ook aangedui dat sý party hulle tot die hof sal wend in ‘n poging om die ramptoestand te stuit.
