29 Junie 2023
Die Suid-Afrikaanse Weerdiens het bevestig dat die “tornado” in KwaZulu-Natal, nié ‘n tornado was nie.
Volgens die Weerdiens was die roterende draaikolk eintlik ‘n grondtuit wat net soos ‘n tornado lyk. ‘n Grondtuit rig na bewering minder skade aan as ‘n tornado.
Intussen het die dodetal na afloop van die gure weer en die tornado in Inanda en Phoenix in die eThekwini-metro tot vier gestyg. Een persoon is ook nog vermis.
Die departement van samewerkende regering in KwaZulu-Natal sê hul voorlopige verslae dui ook daarop dat grootskaalse skade aangerig is aan pad-infrastruktuur, elektrisiteitsnetwerke en huise.
Ten minste 70 huise is vernietig na die tornado Dinsdag deur die woonbuurte van Phoenix en Inanda beweeg het. ‘n Verdere 110 huise en 10 skole is beskadig.
