5 Februarie 2022
Die 59-jarige terreinbestuurder van die Doornkloof Voortrekkerplaas buite Lindley in die Vrystaat is gisteraand in vloedwaters dood toe hy ‘n groep kinders, wat ‘n skool koorkamp bygewoon het, na veiligheid gebring het.
Die gebiedsleier van die Voortrekkers in die Vrystaat, Willie Engelbrecht sê Chris Giliomee het gaan kyk of alles reg is by die koorlede van die Hoërskool Witteberg in Bethlehem.
Engelbrecht het op die Voortrekkers se Facebookblad gesê dat dit gistermiddag begin reën het en na 22:00 gisteraand het daar reeds meer as 100 mm reën geval. Giliomee het boere in die omgewing gehelp om die kinders na veiligheid te bring voordat hy meegesleur is. Die Hoërskool Witteberg het boere in die Lindley-omgewing bedank vir hulle hulp en sê die kinders is almal veilig in Bethlehem.
LEES OOK: KYK: SWAAR REËNVAL VEROORSAAK KITSVLOEDE EN OORSTROMINGS IN GAUTENG
Intussen is nooddienste steeds opsoek na drie mense wat vanoggend vermis geraak het te midde van kitsvloede en oorstromings in Midstream, Centurion.
Swaar reënval het daartoe gelei dat talle paaie en brue in dié gebied asook in ander dele van Gauteng oorstroom het. In Centurion moes vier mense gisteraand deur nooddienste gered word nadat hulle in ‘n motor op die Ou Pretoria-Weg in vloedwater vasgekeer is.
Die Tshwane-metro het in ‘n verklaring gesê dat mense bygestaan word wie se huise in die vloede beskadig is. Mamelodi in die ooste van Pretoria is ook erg geraak.
