4 Mei 2021
Die twee mense, wat dood is toe ‘n brand vanoggend by die F.H. Odendaal-hospitaal in Nylstroom/ Modimolle in Limpopo uitgebreek het, was Covid-19-pasiënte.
Volgens die LUR vir gesondheid in Limpopo, dr. Phophi Ramathuba was een van die oorledenes ’n gevangene wat vir die koronavirus in die hospitaal behandel is. Sy meen beide slagoffers was reeds in ‘n bedenklike toestand nog voor die brand.
LEES OOK: BRAND BREEK BY NÓG ‘N HOSPITAAL UIT
Dié brand het omstreeks half 4 vanoggend in die Covid-19-saal uitgebreek. Verpleegsters het glo probeer om self die vlamme te blus terwyl hulle op die brandweer gewag het.
Volgens die gesondheidsdepartement kon vier pasiënte uit die saal gered word.
Intussen sê die VF Plus lid van die provinsiale wetgewer asook die provinsiale leier in Limpopo, Marcelle Maritz dat Ramatuba streng moet optree oor die stand van hospitale in dié provinsie.
Sy meen die departement van gesondheid in Limpopo moet verantwoordelik gehou word vir die swak bestuur, gebrekkige infrastruktuur en gepaardgaande veiligheidsrisiko’s wat meeste hospitale in die provinsie inhou.
Volgens Maritz het die party ook ‘n skrywe aan die Menseregtekommissie gerig oor dié voorval.
Dié brand kom slegs twee weke nadat ‘n brand ook by die Charlotte Maxeke-hospitaal in Johannesburg uitgebreek het.
