11 Julie 2022
Die minister van polisie, Bheki Cele, sê ‘n span wat uit 11 speurders bestaan is aangewys om gister se skietery by ‘n taverne in Soweto te ondersoek.
15 mense is dood en verskeie beseer toe die aanvallers in die vroeë oggendure op die mense binne die taverne losgebrand het.
Volgens Cele is hulle opsoek na vyf aanvallers, maar die moontlikheid dat ander verdagtes ook by die saak betrek kan word, is nie uitgesluit nie.
Cele – wat deel was van ‘n hoë-vlak afvaardiging – het die toneel vandag besoek.
Volgens die minister is daar 137 patroondoppies op die toneel gekry wat vir forensiese toetse gestuur sal word.
Hy het ook gesê die polisie se taktiese-reaksiemag sal van vandag af in die gebied ontplooi word om te help met misdaadvoorkoming.
