22 Junie 2023
Die polisie is steeds besig met ‘n soektog na ‘n vermiste motoris nadat ‘n voertuig gister van ‘n krans by Voëlklip, by Heroldsbaai in die Wes-Kaap, afgery het.
Volgens die polisiewoordvoerder, sersant Christopher Spies, belemmer gure weer die soek- en reddingspogings.
Volgens Spies bestaan die soekgeselskap uit verskeie nooddienste en is die soektog vanoggend met eerste daglig hervat.
Hy sê polisieduikers en nooddienste van die George-munisipaliteit is op die terrein en besig om aan die soek-en-herwinningsoperasie deel te neem.
Hommeltuie word ook ingespan om langs die kuslyn te soek.
