23 Maart 2023
‘n Brand het vanoggend by die Vrystaatse premier se amptelike woning in Bloemfontein uitgebreek.
Foto’s en videos van die huis in ligte laaie is wyd op sosiale media versprei. Die nuwe premier van die Vrystaat, Mxolisi Dukwana woon nog nie in die huis nie, aangesien die uitgaande premier, Sisi Ntombela tot einde Maart daar kan woon.
Die Mangaung-metro se woordvoerder, Qondile Khedama het buite die huis gesê dat die metro net na half 10 vanoggend van die brand in kennis gestel is, waarna die metro se branddienste onmiddellik ontbied is.
Volgens Kedama het dit die brandbestryders 7 minute geneem om by die huis op te daag, maar dat bykomende dienste nodig was weens die ernstige aard van die brand.
Hy sê die departement van openbare werke was ook op die toneel om die skade aan die gebou te bepaal. Die oorsaak van die brand is steeds onbekend.
