24 Februarie 2022
Militêre magte in Oekraïne sê hulle het daarin geslaag om vier Russiese tenks naby die oostelike stad Kharkiv te vernietig en nagenoeg vyftig Russiese troepe te dood.
Hulle het ook glo ‘n sesde Russiese vegvliegtuig neergeskiet.
Die Oekraïnse regering sê minstens agt burgerlikes is dood in die vuurpyl-aanvalle wat die Kremlin op verskeie stede in Oekraïne geloods het.
LEES OOK: KYK: RUSLAND VAL OEKRAÏNE VANUIT VERSKEIE FRONTE AAN
Lande in Sentraal-Europa het hulle intussen begin gereed maak om vlugtelinge uit Oekraïne te ontvang nadat Moskou met ‘n volskaalse lug-, see- en landelike-inval in Oekraïne begin het.
Die Russiese president, Vladimir Putin sê die doel van die inval is om Oekraïne te ontwapen.
Die inval word beskryf as die grootste in Europa sedert die einde van die Tweede Wêreldoorlog.
