15 September 2021
Die Tshwane Metropolisie (TMPD) sê dit is as ‘n metropolisie sy verantwoordelikheid om toe te sien dat bywette gehoorsaam word.
Die TMPD het gereageer op mediaberigte van ‘n Theresapark-inwoner, Joe Nkuna wat ‘n boete opgelê is weens ‘n groentetuin op sy sypaadjie. Dit het gister aan die lig gekom dat Nkuna ‘n boete van R1500 moet betaal asook sy groentetuin moet verwyder nadat metropolisie-beamptes sy huis besoek het.
Die TMPD sê dit is hulle plig om te reageer op enige klagtes wat ontvang word, ongeag die aard daarvan. Die metropolisie sê in ‘n verklaring dat hulle op 9 September ‘n klag oor Nkuna se groentetuin ontvang het omdat dit op die sypaadjie aangebring is en meen bywette maak dit duidelik dat sypaadjies nié vir die doel gebruik kan word nie.
LEES OOK: PRETORIA-MAN BEBOET VIR GROENTE OP SYPAADJIE
Volgens die TMPD het hulle Nkuna dieselfde dag gewaarsku om die tuin te verwyder, maar dat hy dit nie gedoen het nie, waarna die boete uitgereik is.
Die metropolisie meen luidens die wette kan sypaadjies nié versper word nie omdat dit vir voetgangers bedoel is en omdat dit openbare eiendom is. Die TMPD-woordvoerder, Isaac Mahamba sê hulle het in verbinding met Nkuna getree om hulle kommernisse met hom te bespreek.
“Nkuna het aan die media gesê dat sy vrou dié groente skenk, maar luidens sy sosiale media-inskrywings blyk dit asof van hierdie groente ook verkoop word,” sê Mahamba.
Mahamba sê Nkuna moet die boete teen Oktober betaal en indien hy dit nié doen nie sal ‘n datum gegee word vir hom om sy boete in die hof teen te staan.
Volgens die TMPD het hy ‘n sogenaamde adopt a spot-beleid waar mense aansoek kan doen vir gedeeltes in die stad waar sulke tipe projekte gedoen kan word.
Stem vir die Aitsa’s
