21 Maart 2024
Die voormalige uitvoerende hoof van die omstrede Steinhoff-maatskappy, Markus Jooste het omstreeks 16:00 vanmiddag sy eie lewe geneem.
Volgens verskeie berigte het hy homself in Hermanus naby sy huis geskiet. Hy was 63 jaar oud. Die polisiewoordvoerder, luitenant-kolonel Malcolm Pojie het nie sy identiteit bekend gemaak nie, maar het bevestig dat die 63-jarige man homself in die kop geskiet het.
Met paramedici se aankoms op die toneel het hy nog geleef. Hy is in ‘n hospitaal dood. News24 berig hy het glo opdrag gekry om homself teen môre aan die Valke oor te gee.
Die nuus kom slegs ‘n dag nadat die Gedragsowerheid vir Finansiële Dienste Jooste ‘n boete van R475-miljoen opgelê het.
Foto: Corruption Watch
