25 Junie 2021
Die EFF het die Suid-Afrikaanse Gesondheidsprodukte Reguleringsowerheid – SAHPRA – sewe dae gegun om op hulle eise te reageer, anders gaan hulle buite die huis van die owerheid se raadsvoorsitter, Helen Rees kamp.
Die party het deur die loop van die dag na SAHPRA se kantore in Pretoria opgeruk weens hulle bewering dat die owerheid net sekere entstowwe goedkeur en dat hy onder politieke druk van Westerse lande swik om te sloer met die goedkeuring van entstowwe van China en Rusland.
SAHPRA het gister gesê hy is besig om die aansoeke van die entstofvervaarigers te verwerk, en sal eers seker maak dat die produkte veilig is vir gebruik.
Die EFF se leier, Julius Malema het hul memorandum aan SAHPRA se uitvoerende hoof, dr. Boitumelo Semete Makokotlela oorhandig.
LEES OOK: EFF-OPTOG: POLISIE WIL GLO KRIMINELE KLAGTES AANHANGIG MAAK
Die polisiewoordvoerder, kolonel Brenda Muridili het bevestig dat hulle strafregtelike klagtes aanhangig gaan maak teen die sameroeper van die optog, maar sal later vandag weet watter aanklagte presies ingedien gaan word.
Die huidige inperkingsregulasies bepaal dat daar nie meer as 100 mense buitelig byeenkomste mag bywoon nie. Na raming was daar egter sowat 2000 EFF-lede by die betoging.
Intussen het die DA gesê dat president Cyril Ramaphosa en die regering se inentingsprogram wel besig is om te misluk, maar dat “superverspreider-betogings” nié die situasie help nie.
Die party meen daar is meer as 70 000 aktiewe Covid-19-gevalle in Gauteng en dat vandag se betoging uiters onverantwoordelik was.
