28 April 2022
Die DA sê hy is teleurgesteld in die manier waarop die Gauteng Noord-streeksvoorsitter van die DA, Michael Shackleton bedank het.
Die DA se Fred Nel het aan Pretoria FM gesê dat Shackleton leuens versprei het in die redes vir sy bedanking.
ActionSA het vanoggend in ‘n verklaring aangekondig dat Shackleton uit die DA bedank het en by ActionSA aangesluit het.
LEES OOK: NÓG ‘N DA-LID SLUIT BY ACTIONSA AAN
Die 34-jarige Shackleton het onder meer gesê dat hy bedank het weens die agteruitgang van die DA as ‘n inklusiewe tuiste vir alle Suid-Afrikaners.
Nel voer aan dat Shackleton nooit die redes vir sy bedanking as bekommernisse gelig het gedurende sy tyd by die DA nie. Hy sê die nasionale lede van die party ondersteun nog altyd die raadslede veral in die Tshwane-metro, so Shackleton se bewerings dat raadslede nie ondersteun word nie, is onwaar.
Nel het in reaksie op Shackleton se uitlating; dat die DA nie meer inklusief is nie, gesê dat dit ver van die waarheid is en meen dit is ironies omdat hy nou by ActionSA aansluit, wat eintlik in kompetisie staan met die DA.
