18 Junie 2021
Die kragverspreider, City Power het bekend gemaak dat die Johannesburgse egpaar Zaheer Sarang, en sy vrou, Nabeelah Khan, se dood veroorsaak is deur ongemagtigde veranderings wat aan ‘n elektrisiteitskas aangebring is.
Die pas-getroude egpaar is Sondag in hulle stort doodgeskok, slegs ‘n dag nadat hulle teruggekeer het vanaf hulle wittebrood.
LEES OOK: ONDERSOEK BEGIN NÁ PASGETROUDES GLO IN HUIS DOODSKOK
City Power se woordvoerder, Isaac Mangena het vroeër aangedui dat daar vermoed word dat ‘n foutiewe kragkabel weens onwettige koppelings in die gebied moontlik tot die voorval kon gelei het.
Mangena het nou bevestig dat die nutsdiensmaatskappy se ondersoek daarop dui dat ‘n stukkende verbinding en ‘n lekkasie in die gronddraad van die egpaar se woning die voorval tot gevolg gehad het.
‘n Inwoner van die gebied sê onwettige elektrisiteitsaansluitings deur inwoners van ‘n naby-geleë informele nedersetting is al herhaaldelik by City Power aangemeld.
