26 Oktober 2021
Die burgerregteorganisasie, AfriForum sê hy veroordeel Krieket Suid-Afrika (KSA) se direktief waarin alle Protea-spelers gedwing word om die knie te buig, ten sterkste.
LEES OOK: KRIEKET SUID-AFRIKA SÊ SPELERS MOET “KNIEL TEEN RASSISME”
Ingevolge dié direktief moet alle krieketspelers wat Suid-Afrika in die T20 Wêreldbeker wil verteenwoordig, die knie buig. Indien die speler nie die knie buig nie, kan dit daartoe lei dat die speler uit die span gelaat word en sanksies deur KSA in die gesig staar. Ná die aankondiging het die Protea paaltjiewagter, Quinton de Kock aangekondig dat hy nié aan vanmiddag se wedstryd teen die Wes-Indiese Eilande sal deelneem nie.
AfriForum se bestuurder vir sport, Ronald Peters sê hierdie besluit sal beslis nie die grondwetlike toets in die hof deurstaan nie aangesien dit heelwat regte skend wat deur die Grondwet beskerm word. Hy sê dié regte sluit in die reg op gelykheid en die reg om nie onbillik teen iemand te diskrimineer nie, die vryheid en sekuriteit van die persoon, vryheid van godsdiens, oortuiging en mening, vryheid van uitdrukking, vryheid van assosiasie en die reg om politieke keuses te maak.
LEES OOK: OPVOLG: KSA NEEM KENNIS VAN DE KOCK SE ONTTREKKING VAN WEDSTRYD NÁ RAAD SÊ DAT SPELERS MOET KNIEL
“AfriForum ondersteun die standpunt wat De Kock ingeneem het om op te staan vir sy regte en die reg om te kan besluit watter inisiatiewe hy wil ondersteun. Ons ondersteun verder hierdie besluit omdat die standpunt wat KSA in hierdie geval ingeneem het, onregverdig is en verskeie menseregte skend,” sê Peters.
AfriForum sal met sy regspan vergader oor die pad vorentoe.
Stem vir die Aitsa’s
