21 Oktober 2022
Die burgerregteorganisasie AfriForum sê hy ondersteun ’n optog wat op Maandag, 24 Oktober in Roedtan, Limpopo, ter veroordeling van plaasmoorde deur die Distrikslandbou-unie gehou word.
Volgens AfriForum sal gemeenskapslede en lede van AfriForum saam met ander prominente organisasies die optog bywoon.
LEES OOK: LIMPOPO-BOER DOODGESKIET
Die optog word gehou terwyl die verdagtes in die moordsaak op die boer, Nicky van Rensburg Maandag in die rondgaande hof in Roedtan verskyn. Hulle staan ook tereg op ander aanklagtes nadat Van Rensburg se lewensmaat, Veronica Grobler en ‘n minderjarige seun aangerand is.
“Plaasmoorde- en aanvalle is ’n unieke vorm van misdaad wat tot onbeskryflike trauma lei en gemeenskappe vernietig. AfriForum hoop om deur ons bywoning aan hierdie optog verdere bewusmaking rakende plaasmoorde te skep, en sodoende te help om hierdie gruwelike fenomeen stop te sit,” sê Ernst van Zyl, veldtogbeampte vir strategie en inhoud by AfriForum.
