2 Oktober 2024
Die VF Plus sê die opeenhoping van onopgeëiste liggame in staatslykshuise landwyd is ‘n rede tot kommer omdat dit druk plaas op die bestaande geriewe.
Volgens onlangse data wil dit voorkom asof daar sowat 3 186 onopgeëiste liggame in die land se 130 staatslykshuise is. KwaZulu-Natal met 1 527, en die Oos-Kaap met 526 blyk die grootste probleemgebiede te wees.
Die VF Plus-LP en hoofwoordvoerder oor gesondheid, Philip van Staden sê die hoofoorsake hiervoor is gebrekkige identifikasie en naasbestaandes wat bloot nie die oorskot opeis nie. Hy sê onwettige immigrante wat nie geïdentifiseer kan word nie, dra by tot die probleem.
“Ander faktore is die agterstand en vertraging in die vervoer en ontleding van DNS-monsters, swak kwaliteit vingerafdrukke, uitstaande ondersoeke, korrupsie waar naasbestaandes moet betaal om gestorwenes te kry, uitstaande toksikologiese verslae, die vertraging in begrafnisse en verassings weens ʼn tekort aan grafspasie, begrotingstekorte en krematoriums wat nie voldoende funksioneer nie,” verduidelik hy.
Van Staden meen samewerking moet formeel geskied tussen die nasionale regering, rolspelers in die begrafnisbedryf, die departemente van samewerkende regering en tradisionele sake, binnelandse sake en gesondheid, die polisie, die nasionale gesondheidslaboratoriumdiens asook provinsiale en plaaslike regerings.
Hy sê verder dat bestaande staatslykshuise en krematoriums dringend opgegradeer moet word en nuwes moet gebou word.
