26 September 2023
Die bestuur van die Mabalingwe Wildreservaat sê die oorsaak van die brand wat sedert Saterdag verwoesting gesaai het is steeds nie bekend nie.
Die brand het op ‘n naburige plaas ontstaan en ongeveer 56 huise in puin gelaat, agt huise gedeeltelik beskadig en ‘n boskamp vernietig.
Volgens die verklaring was daar nie enige lewensverlies nie. ‘n Personeellid van Mabalingwe is wel ernstig beseer nadat die wind skielik gedraai het en hy onverwags deur vlamme omsingel is. Die personeellid ontvang tans behandeling in ‘n hospitaal. Geen ander beserings is aangemeld nie.
Die invloed wat die brand op die wildlewe gehad het word steeds vasgestel maar daar is bevestig dat 6- 000 hektaar se weidingsveld vernietig is.
Die bestuur van die Mabalingwe Natuurreservaat het ‘n beroep op die publiek gedoen om finansiële bydraes te lewer ten bate van diegene wat hulle huise verloor het. Daar is ook tans `n behoefte aan voer vir die wildlewe.
