Oorlewende van Air India-vliegongeluk ontsnap betyds uit nooduitgang

‘n Woordvoerder van die Indiese gesondheidsowerheid, Dhananjay Dwivedi sê in teenstelling met aanvanklike berigte, het een passasier gister se vliegongeluk oorleef.

Dwivedi sê dié man – ‘n Britse burger – was saam met sy broer op pad na die Verenigde Koninkryk toe die Boeing 787-8 Dreamliner van die Indiese lugdiens by Ahmedabad tydens opstyging neergestort het.

204 liggame – van die 242 mense aan boord – is al uit die wrak gehaal.

Daar is glo ook mense op die grond oorlede.

LEES OOK: KYK: Vliegtuig met 242 mense aan boord stort in Indië neer

Reuters berig dat die enigste oorlewende, Ramesh Viswashkumar (40), naby ‘n nooduitgang van die vliegtuig gesit het en kon daarin slaag om betyds daaruit te ontsnap.

Hy het aan plaaslike media vanuit sy hospitaalbed vertel dat hy en sy broer by familie in Indië gekuier het.

Hy sê sy broer, Ajay, het in ‘n ander ry van die vliegtuig gesit.

Die meeste passasiers was Indiese landsburgers, asook Britte, Portugese, en een persoon van Kanada.