19 November 2021
“Ons gesin dra hierdie eer op aan elke persoon wat ‘n geliefde daardie dag verloor het, seer gekry het, of nou nog emosionele skade, weens die gebeure op daardie dag, met hulle saamdra.”
Só het Donovan Olckers op sy Facebook-blad geskryf nadat sy ontslape seun, Roydon die presidensiële Orde van Mendi-prys vir dapperheid ontvang het.
Roydon was in matriek toe ‘n beton loopbrug van die Hoërskool Driehoek in Vanderbijlpark op 1 Februarie 2019 ineengestort het en tot die dood van vier kinders gelei het. Roydon, Jandré Steyn, Marnus Nagel en Marli Curry het daardie dag hulle lewens verloor, terwyl ander leerlinge beseer is.
Roydon het die toekenning ontvang omdat hy twee jonger meisies weggestamp het, voordat die blad self op hom geval het. Sy pa het dié toekenning namens sy seun ontvang. “Dit is ‘n bittersoet oomblik. Ek is trots om die toekenning namens my seun te ontvang, maar hy is nie meer met ons nie.”
Die Orde van Mendi-prys vir dapperheid, is die hoogste eer wat deur die president van Suid-Afrika toegeken kan word.
Stem vir die Aitsa’s
