25 April 2023
Die ANC sal nie saam met die DA werk, indien daar na volgende jaar met ander partye in ’n koalisie gegaan moet word nie.
Die party se sekretaris-generaal Fikile Mbalula het vandag die media toegespreek na afloop van die party se vier dag lange Nasioanle Uitvoerende Komitee (NUK) vergadering.
Die party het breedvoerig gesels oor die moontlikheid van ’n nasionale koalisieregering, na afloop van volgende jaar se verkiesing.
“Die ANC sal saam met vryheidsbewegings, klein partye, gemeenskapsforums en onafhanklike kandidate werk. Partye wat giftig is sal nie oorweeg word nie” het Mbalula gesê.
Hy sê die ANC mag dalk ideologiese verskille hê met van die partye waarmee hy sal saamwerk, maar die ANC sal dit steeds oorweeg om met partye saam te werk, solank dit in die openbare belang is.
“Dit behoort enige vrae oor samewerking met die EFF te antwoord. Ons sal saam met die EFF werk”, het Mbalula bygevoeg.
Die party hoop om egter steeds ’n volstrekte meerderheid te haal, en nie hoef staat te maak op samewerking met ander partye nie.
Waar koalisies egter genoodsaak word, wil die ANC hê dat daar seker voorwaardes gestel moet word.
“Koalisieooreenkomste moet openbaar gemaak word, en moet in die gemeenskappe versprei word. Die party met die meeste stemme moet die koalisie lei, en ander poste moet proporsioneel verdeel word volgens die hoeveelheid stemme wat ’n party ontvang het.” het Mbalula gesê.
Volgens hom moet wetgewing ook so gewysig word dat die amptenare van munisipaliteite geisoleer word van politieke onstabiliteit.
