18 Maart 2022
Die Tshwane-metro sê hy het vandeesweek ernstige uitdagings beleef weens ‘n klein groepie werknemers verbonde aan die munisipale werkersvakbond, Samwu wat aan ‘n onwettige staking deelneem.
Die burgemeester in die metro, Randall Williams sê die staking en gepaardgaande geweld word verder aangevuur deur die stakende werkers, wat salarisverhogings eis. Hierdie werkers verhoed sedert Dinsdagoggend ander munisipale werkers om hulle werk te doen.
Verskeie dele van Pretoria is sedert Maandag sonder krag weens kabel-foute. Williams sê die staking het nie net ‘n uitwerking op inwoners nie, maar ook lojale Tshwane-werknemers wat gedreig en geintimideer word indien hulle hul werk wil doen.
Hy sê dissiplinêre aksie teen die betrokke werkers het reeds begin.
